بنااات تبوك قصه فلله تحكي عن الثانويه

بنات تبوك قصة واقعية مجموعة بنات فله وناسه

هـذي آلقـصه جـتني بـلّـوتـوث وآحبيت آنزلهـآإ بآلمنتدى ـآ


Tabuk girLs Story
ب ‏-*-*-*-*H*-*-*-* أحداث هذه القصه حقيقيه والأسماء اللي بالقصه أسماء مستعاره لأسباب بناتيه_
~~~=~~~=~~~=~~~=~~~

أنا أسمي هيله عمري21 سنه {يلقبوني بأبو عراده لأني مسترجله نوعا
ما}

عشت طفولتي بالرياض إلى عمر11 سنه ومن ثم نقلنا إلى تبوك بسنة

1418هجريه وكنت وقتها صغيره شوي{يعني بزر}ونقلنا هنا لأن ابوي

تقاعد ورجعنا إلى موطن أبوي الأصلي.... وكانت حالة عايلتنا النفسيه

سيئه جدا وما حنا قادرين نتأقلم على الجو وكان الحي اللي ساكنيين فيه

مبانيه قليله. ماغير صوت الكلابه تعوي بالخلا وكان مخطط الحي جديد

بتبوك يعني لسه ما أزدهر...{الله لايعيدها من أيام} وما حنا عارفين أحد

بتبوك غير جماعتنا{الله يكثر هالجماعه} وأول ماجينا هنا استلمونا

بالعازيم ماغير غداء وعشاء كل يوم..وكانوا يسوون عزايمهم يابقصر

المدمي {أمحق من قصر حوش ويقولون له قصر } أو عند المواقف اللي

عند مستشفى الملك خالد أو عند حديقته الجوازات {والله ذبحونا} وقتها

مايعرفون الأستراحات....حتى الأسواق ياربي لك الحمد ماغير يعرفون

سوق الخميس والسوق الجديد والأخويا وأفخم أسواقهم الشارع العام

{الجاده} بس الحين تطوروا ماحولك أحد .. المهم>> وأنا كنت أدرس

بالصف السادس الأبتدائي وكانت أول مرحله أدرسها هنا في تبوك ....

وكان البنات اللي في فصلي غريبات الأطوار كلامهن غريب كنت ماأفهم

عليهن كأن أنا من كوكب وهن من كوكب وكانن أكثرهن من ثلاث قبايل

{عاد أنتم عارفين مايحتاج أوضح} وأصلا"إللي ماسكن تبوك مارآح

يعرف هالثلاث قبايل طبعا"غير معروفين بحكم إنها قبائل صغيره ليست

من روس القبائل وكنت بالفصل والفسحه أجلس لحالي ماأختلط فيهن

{ أصلن ماأفهم عليهن} وبعد مرور ثلاث شهور بديت أتعود عليهن

وصرت أخذ وأعطي معاااهن.. وتمر الأيام وتمررر وتمررر عاد توفقت

ونجحت من سادسوانتقلت الى المتوسطه وكنت وقتها فرحانه محد قدها

داخله المتوسطه{ يعنني كبيره} ودرست بالمتوسطه اللي قريبه من بيتنا

وكانت المدرسه جديده بالحي توها فاتحه وكانوا وقتها من قلة المدارس

جامعين المتوسطه مع الثانويه...ومرت سنه وأنا هنا في تبوك وأحس اني

بديت اتأقلم على بنات تبوك.. ودرست أولى متوسط وكانت اول مرحله

أحس فيها بمراهقتي كنت مرقوعه {يعني ملقوفه} لدرجه جنونيه كنت مثل

الولد ما يهمني شي أسوي اللي أبيه..بس كانن الأبلات {الهبلات}

مايتوذن من لاقافتي بالعكس كانن ينبسطن إلا وحده منهن كانت واقفه في

حلقي كانت تكرهني كره العمى أسمها أبله(ميسون) كنا نقول لها أبله

(زيتون) لأنها عبده وأحيانا نسميها‎ ‎‏ أبله (سيفون) وكانت تدرسنا مادة

الدين {والله هذولا اللي يكرهنا بالدين} الله يقلعها كان أكبر مافيها خشمها

زي خشم عيد بن شاكر..الله يعين العبد رجلها عليها.. وياما وياما

تنزلني عند الأداره وأكلها ضرب وتعهدات بس ماأتوب {ماقلت لكم ولد

بنص بنت) عاد تدرون كنا ننبسط أذا حملت الأبله بس نحتريها تولد

علشان تذلف عناااااا>>> ومره من الأيام كنت بالفسحه وكان

شباك المقصف مزدحم من البنات الكل يبي يشتري.. وأحنا بنات

المتوسطه ننرحم كلنا قصار{إلا من رحم ربي} أما بالنسبه لي كنت

قصيره دنفوسه {الحين اللي يسمعكي يقول طولتي كلها انشين بس}

وكنت ماسكه فلوسي ودي أشتري بس ماني عارفه من فوضى البنات...

وإلا وجت وحده من فصلي كنت ماأعرفها كثير بس أعرف اسمها وكان

اسمها{بدره}وشافتني ماشتريت ورحمتني وأخذت فلوسي والله ماقصرت

ودفت البنات و أشترت لي صامولي محشي بفلافل وعصير"لب"

بالبردقان.. وكان ممنوع البيبسي انذاك واللي تجيب ببسي تكتب تعهد

{أمحق من نظام اللي يسمعكم يقول مهربين خمره} وأنا وقتها تفسحت مع

بدره وتعرفت عليها وصارت بينا صحبه وهاذي أول وحده أصاحبها

بحياتي من بعد صديقاتي اللي بالرياض بس كانت مثل طينة البنات اللي م

ا أفهم عليهن بالأبتدائيه.. عاد سبحان الله وافق شن طبقه الصفات اللي

فيني فيها رجه مثلي عربجيه و مسترجله ...الخ_ ومرت الأيام وصارت

معنا مواقف وما ودي أذكرها{محتفظتها لنفسي} والحمد الله

وتوفقناونجحنا وأنتقلنا إلى الصف الثاني متوسط_ وبعد مانجحنا من أولى

جت العطله وفرقتنا أنا وبدره بس ما انقطعنا عن بعض بينا أتصالات

ومقابلات في حديقة الطيور.. وأنتهت العطله وجت الدراسه ورجعنا أنا

وبدره مع بعض وكنا صف ثاني متوسط بس الله يقطعهم فرقونا حطوني

بفصل وبدره بفصل وحاولنا انهم يحطونا بفصل واحد بس رفضت الأداره

علشان المشاكل والحركات اللي صارت في أولى متوسط {حاقدين علينا}

عاد أنا وبدره رضينا بالأمر الواقع...وكنت ماأقابلها إلا بالفسحه وإلا

أحيانا نروح ونجي على بعض من بين الحصص أحيانا أجي والأبله

بالفصل وياما أنطرد عن الفصل >> أقولك حالتنا حاله.....

ومن القهرعلشان ماحطوني بفصل بدره جلست بالأخير وبالزاويه

ومكبسه المكيف علي وكل يوم داعستها نوم وما علي من أحد, العالم

بوادي وأنا بوادي ثاااااني.. وكانت بجنبي بنت جديده عن المدرسه كانت

ساكنه بحي المهرجان ونقلوا بالحي اللي انا فيه وكانت بنت جدا هادئه

وماهو مبين عليها الرقاعيه وتعرفت عليها وكان أسمها "نفلاء" ومع

مرور الأيام أخذت عليها وغيرت البنت99 درجه من بنت هاديه إلى أكبر

عربجيه بالفصل حتى أن الأبلات يشتكون منها وعارفين أصلن من خربها

غير هيله {على قولتهم} بس كانت تعجبني هالبنت ترد على الأبلات

{الهبلات} وبذات السعلوه أبله "هيه" حقت العربي اما الأبله هاذي

جنناهااا بهبلاناااا وياما وكلانها مقالاب ومن المقالب اللي أكلتها منا

هالسعلوه مره حطينا على الكرسي اللي دايما تقعد عليه لزق بسكوت ريكو

علشان إذا قعدت وقامت يلزق بتنورتها...{وتعال وشوف شكلها من ورا

ههههاي}...>>>


وعرفت بدره على نفلاء وصار بينا صحبه أحنا الثلاثه وكانوا يسمونا

الثلاثي المرح من الهبال اللي عشناه{وووووالله فله} وأنتهت السنه

وخلصنا الأمتحانات_ ونجحت بدره أما أنا ونفلاء رسبنا بالقواعد الله

يقلعها السعلوه تقعدت لنا بالقواعد. بس والله من حقها ترسبنا المسكينه

جنناهااااا_


ومرررت العطله وحنا والاتصالات اللي ماتنقطع...وأخذنا أنا ونفلاء الدور

الثاني بالقواعد والحمد الله نجحنا وانتقلنا إلى صف ثالث متوسط ومن

حسن حظنا حطوناكلنا الثلاثه في فصل واحد..وجالسات بجنب بعض

وبالأخير وطبعا أنا بالزاويه وجنبي بدره وعلى الطرف نفلاء,وعرفتنا

بدره على شله درسن معها بثاني متوسط وكانت هالشله جالسات قدامنا

وعلى قولت بدره هالشله زاااااااحفات حبتين ونص {والله وعز الطلب}

وكانت زعيمتهن أسمها "سويلمه" ويلقبونها بالبازوكه. أما الذراع

الأيمن للبازوكه "بسمه" ويلقبونها بالفصل بدجاجة سويلمه لانها على

نياتها كل اللي تامر فيه البازوكه تنفذه. وأما الذراع الأيسر

لها"عيده"ويلقبونها بالخفاش الأسود لأن حواجبها كثيره بالمره مغطيه

نص جبهتها..وكانت هالشله أكبر مهربات بالمدرسه عاد تدرون وش

يهربن >>>>>$مريسه$


هذا أخطر من الهرويين ومصدره من عيده لأن أبوها عنده غنم ..ويبيعن

أربع حبات بريال بس مين المستفيد من فلوس هالتجاره الرابحه غير

البازوكه تشتري فيها فسحتها...و المهم>>وكانت هالبازوكه محد يقدر

يتجراء ويغلط عليها الكل كان يتجنب لسانها حتى الأبلات يخافن منها,

تدرون ليش الكل يخاف منها لأن أبوها فراش المدرسه وعماره المدرسه

كمااان له{هههاي مدرسة أبوها}...


وتمر معنا مواقف أحنا وشلة بازوكه ومن المواقف اللي مانسيتها.. مره

قررنا اننا نجيب معنا يوم الأربعاء مسجل صغير وأشرطة أغاني وكنا

عارفين أن حصة يوم الأربعاء الأخيره فاضيه .. وسوينا عرس وكانت

العروس نفلاء والعريس أنا وأم العروس البازوكه وام العريس بدره.. أما

بسمه وعيده أخوات العروس ....


وسوينا بالطاولات منصه وحطينا الكراسي ورا بعض وجلسنا

البنات,ولبسنا العروس شال أبيض حق فستان بدره.. وأنا العريس لبست

عبايه وسويت بالشيله شماغ وحطيت طوق بدل العقال وحطيت لزقه

سوداء يعنني شنب طلعت مثل زورو وشغلنا المسجل وحطينا أشرطة

طقاقات..ورقصن بعض البنات وكل وحده طلعت مهارتها بالرقص والمهم

وسوينا الزفه وكان على أغنية هب السعد ومشينا أنا والعروس إلما طلعنا

على المنصه وبالعافيه طلعنا غير بالشيل, وجلسنا على كرسيين وتقوم أم

العروس وام العريس يرقصن على أغنية مشكلني لراشد الماجد وزعم

ودنا نسوي أكشن مثل اللي بالمسلسلات المصريه أن أم العروس وأم

العريس يتضاربن وفعلا وتضاربن البازوكه وبدره وفعش وفعيش وضحك

وصراااااخ .. وشوي وينفتح الباب علينا بقوه والى وهاذي ابله"مها" أم

كشه صفرا وأحنا الله لا يوريكي قلوبنا طاحت ببطونا ولحظة صمت

مفاجئه ماغير صوت راشد يغني {مشكلني حبك ياروح الروح مشكلني}

وكان منظر أبله مها يضحك مبققه عيونها على اللي شايفته عرس

بمدرسه ويتطاير منها شرار الشر وطفت المسجل ووقفت البنات على

جنب واحنا وشلة بازوكه على جنب وأرسلت وحده من البنات تنادي

المديره والأداريات وإلا شوي وجت المديره والوفد اللي معاااها وكانت

ماسكه مسطره طولها مترين وقامت أخذ وضرب في بنات الفصل.أما أحنا

الرؤوس المدبره أنا ونفلاء وبدره وسويلمه وعيده وبسمه نزلونا تحت

وبدا التحقيق مع المديره ولكم وتعطينا ذيك التهزيئه وكتبنا تعهد وكل

وحده أخذت عشر ضربات باليد ودقن على أمهاتنا وصاااار اللي صاااار

وفرقونا الله لايربحهم وحطوني أنا وسويلمه بفصل وبدره وبسمه وعيده

بفصل وأما المسكينه العروس نفلاء بفصل لحالهااا.. وكان هذا اليوم يوم


أسود بالنسبه لنا مو عشان اللي سويناه بالعكس علشان فرقونا وانتشرت

سالفتنا واشتهرنا بالمدرسه كلهااا.. وسمينا ذاك اليوم بنكبة أم كشه

صفراء{الله لايعيده من يوم} ورضينا بالأمر الواقع وماكنا أنا وسويلمه

نشوف الشله ألا بالفسحه,وماقصرت المديره حطت لنا بنات جاسوسات

يراقبن حركاتنا بس كنا ماخذات حذرنا بكل حركه نسويها ومرت هاذي

السنه وحنا متفرقات عن بعض بس أحس أن هالتفريقه هجدتنا شوي....

ومرت الشهور و الأيااام وخلصنا الأمتحانات وأخذنا النتائج والحمد الله

نجحنا وخلصنا المتوسطه في عام 1421هجريه بتقدير جيد وانتقلنا

للثانويه ,, وجت العطله والكل سافر..أما البازوكه سافرت للندن

{شقري} وبسمه سافرت للأردن ونفلاء سافرت للعلا أما أنا وعيده وبدره انطقينا بتبوك...>>>


وبدت السنه الجديده وهاذا أول يوم أنداوم فيه بالثانويه وقابلت البنات

بدره ونفلاء وسلمت عليهن وطبعاكل وحده توري الثانيه المريول

الجديد ,..,,وقتها فقدنا شلة البازوكه عن المدرسه وإلا وهاذي بسمه

جايه وسلمنا عليها وانصدمنا يوم علمتنا بخبر سويلمه وعيده...


سويلمه نقلت للثانويه العاشره وعيده تزوجت ولد عمها وقعدت بالبيت..


وأحس أن المدرسه مالها حلا من دون البازوكه والخفاش وحتى بسمه

المسكينه ماهي قادره تعيش من دونهن وقررت بسمه أنها تنقل عند

بازوكه بالثانويه العاشره .. ورجعنا أنا وبدره ونفلاء مع بعض "الثلاثي

المرح" ودرسنا اولى ثانوي وكانت هالسنه بأثقل سنه تمر بحياتنا لان

فيها مواد علميه كثيره.... ومره من الأيام حسينا أنا ونفلاء أن بدره

متغيره علينا وحاولنا اننا نعرف وش السبب أثري البنت معجبه بوحده

وكان أسم البنت "بيادر" وهالبنت جدا هاديه وناعمه ودوبها تتقطع من

النعومه وخوياتها "غيداء"و" انهار" وجالسات هالبنات قدام بالفصل

وعرفتنا بدره عليهن وصار بينا !عيش وملح! وخليناهن يغيرن مكانهن

وينقلن عندنا ورا علشان تكمل الشله, قلنا غدي الله يعوضنا عن شلة

بازوكه {الله يذكرهن بالخير} وكانت هالشله نعمه من الله اثريهن ماهن

قليلات شر"عربجيات" أما هاذي بيادر يحبها ولد جارهم و غيداء يحبها

ولد خالتها وأنهار كل يوم تحكيلنا عن الأفلام الأباحيه اللي تابعها .....أما أنا وبدره ونفلاء فاتحات فقمتنا مانعرف هالحركات هاذي"أحبه ويحبني"

وكان كل وحده تعلمنا بالحركات اللي تصير مع عشيقها,أما هاذي بيادر

كانت تورينا الرسايل اللي يرسلها لها حبيب القلب "ناصر" وغيداء أنا

كنت أكتب لها الرسايل اللي ترسلها ل"مشعل"لأن خطها مو واضح

{وكنت مسويه تحدي مع مشعل بين خطي وخطه بس طبعا انا اللي فزت بالتحدي}
>>>


ومره من الأيام... علمني أخوي على النت وصرت أدخل مواقع والشات

وأدمنت على هالشات وصرت 24ساعه قدامه أمسكه من أول ماأجي من

المدرسه الى المغرب ومن بعد المغرب أذاكر واتعشى وأعين من الله خير

وأنام من الساعه10 الى الساعه 12ومن بعد12 أمسك الشات

للفجر..وأروح للمدرسه مرهقه وعيوني حمر من قلة النوم وحالتي

حاله ,,وتعرفت على واحد يدرس في ثانوية بدر وكان أسمه"نواف"

وصار بينا معرفه وعلمت صديقاتي بالسالفه وقررت بدره أنها تتعلم على

هالشات وعلمتها عليه وصرنا ندخله ونتقابل بالشات و ضحك وتريقه

على خلق الله "بالذات المصاريا" أما نفلاء ماهي راضيه باللي نسويه

وتنصحنا بس مافي فايده{أدمناه} وبيادر وغيداء مايدخلنه يعتبرنها خيانه

بالنسبه ل"ناصر"و"مشعل" ...


المهم.. وعرفت نواف على صديقاتي حتى هو عرفنا على

أصحابه"خالد"و "بدر"
و"عبدالعزيز" وصار صحبه بين شلتي وشلته ومره من الأيام قراروا

أنهم يجون لمدرستنا يوم الأربعاءعلشان نشوفهم, ووعدناهم بس أحنا

ماخذات حظرنا انهم مايعرفونا ولا يشكون بحركاتنا علشان مايلحقونا

لبيوتنا.. ووصف لي نواف سيارته اااالكامري ولوحتها>> جاء يوم

الأربعاء ودق جرس الحصه الأخيره واحنا على طول أخذنا عبايتنا

وطلعنا ووقفنا برا نحتري نواف وشلته وإلا وشوي جاء نواف والشله

بالكامري وكان نواف طاق ذيك النظاره و القبوع الأحمر طلع جنااااان

يشق القلب شق حتى شلته كاشخين وكان كل واحد أحلى من الثاني

وصوت الأغاني عالي على الأخير وحاطين أغنية خالد عبدالرحمن" ماني

على فرقاك ياشوق ناوي .." هو قاصد يحطها علشان نكي بالشات

"شوووق "__ وأحنا يوم شفناهم تصلبنا بمكانتنا ذبنااا بالذات بدره

وأنهار طاحن عند نواف وعبدالعزيز...كانوا طالعين جناااااان بالنظاره...


ويافرحه ماتمت ووقف وراهم جمس الهيئه ونزل أثنين من المشايخه

ويوم قربوا عندهم ولك يفحط نواف ذيك التفحيطه وحرك السياره بسرعه

جنونيه حتى والله خفنا عليهم .. ويركبون المطاوعه جمسهم وطردي

ورااااهم ... وبعد ماراحوا نواف وشلته والهيئه عاد كل وحده روحت

مشي لبيتها والكل يرقع قلبها يوم شفناهم...


ويمر الخميس والجمعه على احر من الجمر وأنا ماشفت نواف بالشات

وجاء يوم السبت وداومنا كلنا.. وخفنا على العيال ان صار لهم شي يوم

الأربعاء بسبتنا,وقررت بدره انها تروح مع السواق وقت خروج الطلاب

لثانوية بدر وتسأل الشباب عنهم.. بس انا عييتها على الفكره قلت والله

الشباب مايتركوكي لحالك غير ياكلوكي بعيونهم وكمان خفت عليها من

السواق يعلم أبوها وتروح بدره بخرايطها.....


وتمررر الشهووور و الأيااااام وأحنا ماندري عن خبر نواف وشلته حتى

الشات ماصار يدخله و حتى انامن بعد نواف تركت الشات,, {الى يومك

هذا ماندري عنهم يمكن ماتوا}


وخلصنا اولى ثانوي ونجحنا ولله الحمد.. وجت العطله


واحنا زيارات عصريه على بعض كل جمعه..{شبات}


ونهاية العطله قرر أبوي انه يطلعنا لحقل نغير جو قبل لتبدا المدارس,

وأخذنا شاليه من شاليهات لمدة أسبوع ورجعنا من حقل لتبوك...>>


وبدت السنه الجديده ودخلنا أنا والشله ثاني أدبي_ {من زود الشطاره

هههاي} كنا نقول اللي تدخل علمي عرقها مصري, أما ثاني أدبي صدق

رااااااحه مثل مايقولون الحصص قليله والسابعه دايما فاضيه...!!وكنا انا

وبيادر وبدره ونفلاء وغيداء وأنهار بفصل واحد و جالسااات بجنب

بعض وبالأخير وتعال وشوف الشاهي والحليب والفصفص والتمر والزبدة

اللي تسويها لنا أم بدره الله يذكرها بالخير الي يشوفنا حشى طالعات

كشته ماحنا بمدرسه ومره من الأيام المدرسه سوت مجلس أمهات وأحنا


نبي نسوي عيد ميلاد غيداء و تواعدنا أننا نلبس من تحت المراييل

بناطيل جينز وقتها الجو شاتي برررد وانتم عارفين بعد الحفل البنات

أكثرهن ينزلن تحت بالساحه,وعاد واحنا جايبات مسجل صغيروأشرطة

دبكات وشلنا الطاولات والكراسي على جنب {ذكرنا بنكبة أم كشه صفراء

بثالث متوسط }


وخلينا وحده من البنات تراقب لنا الوضع من برا,, المهم


ورفعنا مراييلنا ودخلناها جوا البناطيل وعلينا الجاكيتات من فوق المريول

وكأن ماعلينا مراييل. وحطينا على دبكات شاميه{ شريط أخو نفلاء }

ورقص ودبك حشى كأنا بكابريه ماحنا بمدرسه وكان أحسن وحده فينا

تدبك بيادر لأن عمها مدربها.. وووناسه إلما دق جرس الطلعه والحمد الله

محد كشفنا الكل منشغل بالحفل, وعدت حفلة عيد ميلاد غيداء على

خيرررر >>>


ومره من الأيام قررنا اننا نتقابل يوم الخميس ب "فن بارك" وفعلا رحنا

أنا وبدره وبيادر وغيداء وأنهار, ونفلاء ماراحت كان عندهم شبكة بنت


خالتها ..

ولعبنا وهسترنا بالقراصنه ودوخنا الشباب بضحكنا وسواليفنا الكل يلحقنا

ويطش علينا رقمه.بس احنا يعنني نطنش وكانت بدره مواعده واحد من


شباب الشات أسمه "مرضي" ووعدته عند كوفي شوب فري تايم

وتركناها قلنا لها هاذا وجهنا اذا جاكي لأن عارفين الشباب ماعندهم ماعند

جدتي. وأصرت انها تستناه وخليناها ورحنااا ويوم أحنا ندج بالملاهي

ومرينا على مشروبات لبنان والا وهاذي بدره ومعاها مرضي ومن زود

الكرم تبي تشتري له عصير كوكتيل, وكان مرضي كاشخ ذيك التكشيخه

ولابس ثوب أسود ومسوي بالغتره كوبرا بس مبين عليه انه بدوي

عرفت من عيونه شهب قالبهن الشمس... واستفادت بدره من مرضي

عشاها ولعبها على حسابه إلما داااخت واللي يشوفهم كأنهم

عرررررسان, والمهم وروحنا من فن بارك الساعه 12 ويادوب فكينا

بدره من مرضي ناشب لها دوبه لايبكي يوم روحت ,,, بس وعدته بدره

انهم يتقابلون الخميس الجاي وحده من الحدايق اللي على طريق

المدينه,,>>
وجااااء يوم الخميس ورحنا كلنا, ونفلاء راحت معنا وماهي داريه بسالفة

بدره ومرضي والوعود اللي بينهم لانها ماراحت معنا بفن بارك وأخذنا

لنا كبينه وطلبنا شاهي وكل وحده معسل بالتفاح.. والمهم ويوم أحنا

قاعدات نشرب ونشيش ,وشكل مرضي عرفنا من ضحكنا ويوم نزهم على

بعض بأسامينا وشوي وقرب وجاء من ورا نفلاء وقال مسااااء الخير

ياحلوات وما أمدا مرضي يكمل كلمته والا وتكب نفلاء عليه كوب شاهي

حااامي على جسمه ويحمد ربه انه لابس جاكيت والا كان ينصلخ جلده.

غسلت شراعه نفلاء وقالت له بصوت عالي ياقليل الحياء ياواطي صدق

انك ماتستحي والا وجاء حراس الأمن وكحتوه براااا.{يعني طلعوه برا}

أما بدره حاطه يدها على فمها ماهي قادره تستوعب اللي صار بمرضي.

بس أحنا سكتنا وما علمنا نفلاء انه صديق بدره لان نفلاء ماتحب

هالحركات وياما تنصحنا عن هالشباب بس حنا من رد عليهااا .. ويوم

خلصنا من الشرب والمعسل والضحك والتريقه على خلق الله ودنا نروح

ولكي نمشي ويوم طلعنا من البوابه والك وجانا رشة مويه باااارده من

ورا واثريه مرضي الله يرجه ويضحك وقال وحده بوحده ياصايعات

وهرب على طول وركب سيارته الكابرس, وأكثر وحده أكلتها رش أنا

وغيداء وضحك علينا الناس{فشيله} ووحده مرت من عندنا قالت لنا

تستاهلن.. وعاد وركبنا الجيب مع سواق بدره وأحنا كلنا مروشات مويه

ووقتها عاد صخنت من البرد وغبت أسبوع عن المدرسه وكله من سبة

مرضي الأشهب الله يقلعه..>>

وبعد مافكتني الصخنه داومت بالمدرسه و ما كنت متوقعه أنهم كانوا

فاقديني البنات والأبلات كلهم يتحمدون لي بالسلامه {والله ماهم دارين من

اللي سبب لي هالصخنه غير موية مرضي الله لايعيده}..>>>>


وتمرررر الشهورر والأيااام


وحنا ندرس ثاااني ثااانوي وعدينا الأمتحانات على خير ونجحنااا وانتقلنا الى ثالث ثاااانوي..>>>


واتفقنا كلنا اننا ندخل مدرسه خاصه علشان نجيب نسبه زينه


ماعدا أنهار ظلت بالثانويه نفسها.. ودخلنا مدرسة دار الحنان الأهليه..

ووناسه الأبلات أكثرهن مصريات وحنا تريقه على كلام المصريات حتى

تعودنا على الكلام المصري وصرنا نكتب نص الكلام اللي بالدفتر

مصري...{أمحق من لهجه}>>


وتمر معنا مواقف كثيره في دار الحنان وكانت أحسن مدرسه أهليه من


ناحية الزحف >> ومره قررنا أنا والشله اذا فاز المنتخب السعودي بكأس

الخليج15،،اننا بعد المباراه على طول نطلع مع سواق بدره الجديد


والسواق هذا ذيخ على نياته نسوي اللي نبيه مو زي سواقهم الأول الله

يقلعه كان يضلل القزاز وما يخلينا نفتح الشبابيك المهم ومرت علينا بدره

كلنا وأخذتنا مع سواقها ورحنا عند مخطط الريان وسوينا بالأعلام

لثمات وحطينا على أغنية (ياسلامي عليكم يالسعوديه ياديار الشيم يادار

الأوطاني....الخ) وأحنا الله لايوريكي هسترنا ورقص وصرااااخ والشباب

يفحطون ووووناااااسه لآخر درجه.. وبعد ماخلصنا تشجيع روحنا لبيوتنا

بخير بعد المطارده من بعض شباب تبوك المتخلفين، ، ، ،


ومررررت الأيام والشهورررر وأحنا ندرس وخلصنا الدراسه

والأمتحانات وكانت أسئلت الوزاره صعبه شوي بس الحمد الله عديناها

على خير ونجحنا ولله الحمد وكانت نسبتنا لا تقل عن 84 % وكانت

أعلى نسبه فينا بيادر كان نسبتها 91 %... وسجلن البنات في كلية

التربيه بقسم تاريخ إلا أنا سجلت بجامعة الملك سعود بالرياض بقسم علم النفس،،

وانا ماكنت ابي الجامعه ابي كلية تبوك علشان الشله بس أبوي أصر علي

ان ادرس بالجامعه عند أخواني ورضيت بالأمر الواقع وافترقنا أنا

والشله وكان أمر صعب علينا واحنا ماغير جعير وبكاء أذا شفنا بعض

وسويت حفلة وداع بالبيت عندنا وعزمتهن وكان كل وحده ماده بوزها

بس وعتهن أني ماأقطع الأتصال عنهن وأن كل ماأجي لتبوك أسير على

كل وحده منهن في بيتها،،،،


ورحت للرياض ودرست بالجامعه وتعرفت على شلة بنات بس ماهن

أحسن من شلة بنات تبوك وأنا الحين كل ماجيت لتبوك بالأجازات عند

أهلي أسير عليهن ويسيرن علي ونتواعد بحديقة أمواج النسائيه وإلا

الحكير >> صدق مثل ماقالوا (عاشر من تعاشر فلا بد من الفراق) صدق


والله الفراق صعب بالذات فراق بنات تبوك ......



النهاااااThe Endااااااايه‎ ‎‏ ‏